أخبار الجزيرة المصورة

15 يناير 2012

صباحك زى وشك يا مصر

الميدان الابراهيمى
صباح الخير على الميدان الابراهيمى وش الفجر ، والفاتحة اللى بقراها بالغفران لأمى وأبويا .. صباح الخير وانا ببص على تربة أمى اللي قالتلى وانا رايح جرنالى زمان " يابنى البلد بلدهم يعملوا فيها ما بدالهم ، ما تبقاش عنيف !" .. صباح الخير على كل ست بتعمل مسقعه ، وملوخية تضيع مستقبلك.. صباح الخير على عربيات السرفيس المكسره واللى كراسيها من غير شلت .. صباح الخير على كل زوجه مابتنكدش على جوزها ، وكل راجل مابيستقواش على ولية .. صباح الخير على كل ندهة بابا وكل لعبة لبنوته ومسدس ميه لاخوها .. صباح الخير على كل الاسئلة اللى بتنضربلك من ابنك وبنتك ، وانت قاعد ة عاملى فيها ابو العريف.. صباح الخير على كراتين الجهاز المتعانة فوق الدواليب وتحت السراير.. واحلام الجواز المتحاشة تحت البطاطين .. صباح الخير على الثوره لما تقلب نظام وتهد جبال .. صباح الخير على دعوة ربنا يكفيك شر طريقك .. صباح الخير على مولانا الراحل الشيخ الشعراوى وهو بيقول لواحد صاحبنا ( اذا كنت قدرنا فليعنا الله عليك ) وعلى عبد الحليم وهو بيعيد كوبليه حبيبى والله لسه حبيبى والله ، وعلى أم كلثوم وهي بتقول تهون عليا الروح لو فارقت جنبي ، وعلى محمد فوزى وهو بيقول اى حاجه يعوزها ..

هناك تعليق واحد:

  1. الميدان كان جميل قوي
    البلد دي من 15 سنة فقط كانت شوارعها بسيطة وجميلة

    ردحذف

معرض الصور

معرض الصور


من البداية